Məhkəmə eksperti şəhadətnaməsinin verilməsi üçün komissiya yaradılır

Məhkəmə eksperti şəhadətnaməsinin verilməsi üçün komissiya yaradılır
Cəmiyyət
Oxunma sayı: 15 937
Məhkəmə eksperti şəhadətnaməsinin verilməsi üzrə yeni qaydalar müəyyənləşir. Şəhadətnamələrin verilməsi üçün ekspert-ixtisas komissiyası yaradılır.
Bununla bağlı Baş nazir Əli Əsədov Qərar imzalayıb.
Bu Qayda məhkəmə ekspertizası idarələrinin ekspertlərinə, habelə özəl məhkəmə ekspertlərinə məhkəmə eksperti şəhadətnaməsinin verilməsi qaydasını müəyyən edir.
Şəhadətnamə tabeliyində olan məhkəmə ekspertizası idarələrinin ekspertlərinə Daxili İşlər Nazirliyi, Səhiyyə Nazirliyi və Ədliyyə Nazirliyi, özəl məhkəmə ekspertlərinə isə Ədliyyə Nazirliyi tərəfindən verilir.
Qərarda, həmçinin bildirilir ki, məhkəmə ekspertlərinə şəhadətnamənin verilməsi və ya şəhadətnamənin verilməsindən imtina edilməsi ilə bağlı məsələlərin həlli üçün dövlət orqanlarının hər birində 7 (yeddi) nəfərdən ibarət tərkibdə daimi fəaliyyət göstərən Ekspert-ixtisas komissiyası yaradılır.
Komissiya üzvlərinin səlahiyyət müddəti 3 (üç) ildir. Səlahiyyət müddəti bitmiş üzvlər yenidən komissiyanın tərkibinə daxil edilə bilərlər.
Komissiyanın işinə 10 (on) ildən artıq müvafiq sahədə təcrübəyə malik olan mütəxəssislər cəlb edilə bilərlər.
Komissiyanın üzvləri komissiyanın səlahiyyətlərinə aid bütün məsələlərin həllində bərabər hüquqludurlar.
Komissiya üzvlərinin hüquqları aşağıdakılardır:
komissiyanın səlahiyyətlərinə aid məsələlərin həllində iştirak etmək və təkliflər vermək;
komissiyanın iclaslarında iştirak etmək, komissiyanın işinin təşkilinə və baxılan məsələlərə dair fikir bildirmək, suallar vermək;
komissiyanın qərarı, protokolu və digər sənədləri ilə tanış olmaq;
qəbul edilməsi təklif olunan qərarın lehinə və ya əleyhinə səs vermək, qərarla razılaşmadıqda xüsusi rəy vermək.