Müdafiə Nazirliyində mənzil bölgüsü, yoxsa haqq-hesab ?- Nizam Osmanovun dəstəsinin mənzil biznesi
Manşet
Oxunma sayı: 186
Məlumdur ki, hərbi qulluqçuların sosial-məişət və mənzil-kommunal şəraitlərinin daha da yaxşılaşdırılması həmişə ölkə rəhbərliyinin diqqət mərkəzində olub.
Cənab Prezident İlham Əliyevin göstərişi ilə hərbçi ailələri üçün yeni binalar, hərbi şəhərciklər inşa edilib.
Çox təəssüf ki, Müdafiə Nazirliyinin Mənzil İstismar İdarəsində çalışan bəzi rəislərin, JEK işçilərinin qanunsuz əməlləri bəzi hərbçi ailələrini narazı salır və bu narazılıq mətbuat səhifələrinə də çıxır. Hətta bu narazılıqdan yaranan şikayətlər Hərbi Prokurorluğa, ölkə rəhbərliyinə ünvanlanlr.
Yəni dövlət vəsaiti hesabına hərbçilər üçün inşa edilən xidməti mənzillər kimlər üçünsə al-ver mənbəyinə çevrilir.
Və çox təəssüf ediləsi haldır ki, belə neqativ hallara yol verən Mənzil İstismar İdarələrinin Hissələrinin rəisləri Müdafiə Nazirliyinin Maddi-Texniki Təminat Baş İdarəsinin rəisi Nizam Osmanova arxalanırlar.
Onu da qeyd edək ki, cənab Osmanovun adı daha çox neqativ hallarda hallanır, mediada onun mal-qara fermalarından bəhs edilir.
Sözün qısası, MN sistemində mənzil bölgüsündə ədalət tərəzisi NÜSRƏDDİN kimi “makler”lərin əlindədir.
Deyilənə görə Əhmədlidə ( Zığda) JEK rəisi olan Nüsrəddin dövlətin hərbçilər üçün tikdiyi mənzilləri dədəsinin malı kimi satıb cibinə qoyur.
Məsələn, 40 saylı mənzili Anar adlı şəxsə satıb, o da həmin mənzili kirayə verib, yəni onun və ailəsinin mənzilə ehtiyacı yoxdur.
Nüsrəddin o qədər həddini aşıb ki, 42 saylı mənzili heç vaxt hərbdə olmayan şəxsə 3 min manata satıb. Ulduz hərbi şəhərciyindəki mənzili 7 min manata Racib adlı şəxsə satıb.
Ümumiyyətlə, belə hallar MN-nin Mİİ-də kifayət qədərdir.
Məsələn, 9 A saylı binada Elmarın və Ömərin 2 mənzili var.
Yaxud Dövlət Sərhəd Xidmətindən 157 E maddəsilə qovulan Ramin adlı şəxsin hərbçilərin binasında 2 mənzili var.
Elə hərbçi ailələri də var ki, illərlə mənzil gözləyir, ancaq rüşvət vermədiyi üçün mənzil ala bilmir. Narazı olan hərbçilər rəhbərliyə, Hərbi Prokurorluğa müraciət etsələr də Nüsrəddin barədə tədbir görən olmur.
Hətta deyirlər ki, Nüsrəddin yuxarıda qeyd etdiyimiz Nizam Osmanova arxayın olduğu üçün heç kimdən çəkinmir.
Bəli, Nüsrəddin hərbiçilər üçün tikilmiş binalardakı 1 otaqlı mənzili 4 minə, 2 otaqlı mənzili isə 7 minə satır.
Əslində Nüsrəddin bu işlərin icraçısıdır. O, Elmarın tapşırıqlarını yerinə yetirir və yığılan pulları ona çatdırır. Elmar isə KEU-nun rəisidir.
Elmar isə yığdığı pulların haqq-hesabını 3 mkr bazarının yaxınlığındakı Nizam Osmanova məxsus kafedə sahibinə çatdırır.
Yeri gəlmişkən, həmin kafe Nizam Osmanova məxsusdur.
Bütün bu narazılıqlar, şikayətlər barəsində dəfələrlə Hərbi prokuror Xanlar Vəliyevə müraciət olunub. Görəsən, cənab Vəliyev hara baxır ?
Yazıda adları çəkilən bütün tərəflərin münasibətini dərc etməyə hazırıq.
P.S. Nizam Osmanova məxsus kafedə MAXE xanımlarla aparılan söhbətlər isə növbəti yazının mövzusudur. /Gundelik-baku.com/
